به گزارش خبرگزاری معمار؛ تیم ملی فوتسال افغانستان روز دوشنبه ۲ اسد، در دومین دیدارش در رقابت‌های مرکز آسیا (کافا)، در برابر تیم ملی فوتسال اوزبیکستان پیروز شد.
این دیدار که در شهر دوشنبه، پایتخت تاجیکستان برگزار شده بود، افغانستان با نتیجه ۴ بر ۳ بر حریفش غلبه کرد.
فوتسال‌بازان کشور پیش از این در چارچوب این رقابت‌ها تیم قرغیزستان را مغلوب کرده بودند.
در این رقابت‌ها تیم‌های ملی فوتسال افغانستان، اوزبیکستان، ایران، قرغیزستان، تاجیکستان و ترکمنستان حضور دارند و با هم رقابت خواهند کرد.
ملی‌پوشان کشور در ادامه این رقابت‌ها به روز چهارشنبه هفته روان به مصاف تیم ملی فوتسال ایران خواهند رفت.
