خواجه محمد آصف، وزیر دفاع پاکستان می‌گوید که تاجیکستان و پاکستان با تهدیدهای امنیتی از داخل خاک افغانستان مواجه‌اند.
به گزارش خبرگزاری معمار؛ «خواجه محمد آصف» وزیر دفاع پاکستان در دیدار با «شیرعلی میرزا» وزیر دفاع تاجیکستان اظهارداشت دو کشور به دلیل همسایگی با افغانستان با تهدیدهای امنیتی از این کشور مواجه هستند. آصف اذعان داشته که “تمام مسایل مربوط به افغانستان باید به شکل صلح‌آمیزی حل شود.”
وزیر دفاع پاکستان با ابراز قدردانی از نقش تاجیکستان در تقویت صلح و ثبات در منطقه، خواستار افزایش همکاری‌های اطلاعاتی و تکنیکی با نیروهای مسلح آن کشور شده است.
در همین حال، وزیر دفاع تاجیکستان گفته است که آنان با پاکستان برای تقویت روابط دوجانبه همکاری می‌کنند.
این در حالی است که روسیه و کشورهای آسیای میانه به ویژه تاجیکستان نسبت به گسترش فعالیت‌های تروریستی در مناطق مرزی افغانستان با این کشورها به شدت نگران اند.
