د طالبانو د تماس د کمیسیون اهدافو او کړنو ته یوه کتنه

د طالبانو د حکومت له افغان شخصیتونو سره د اړیکو کمیسیون، چې د طالبانو د تماس کمیسیون په نوم یادیږي، په دې وروستیو کې اعلان کړي دي چی د دغه کمیسیون د فعالیت له پیل راهیسې، له پخوانیو چارواکو څخه څه باندې یو زرو کسان هېواد ته راستانه شوي او د معافیت کارتونه یې ترلاسه کړي دي. د طالبانو د دغه کمیسیون ویاند مولوي احمدالله واثق پرون د طالبانو تر ادارې لاندې د افغانستان له ملي راډیو او ټلویزیون سره په خبرو کې وویل: “هر افغان چې افغانستان ته ستنېږي، کولای شي د نورو افغانانو په څېر په دې هېواد کې خوندي ژوند وکړي.” خو د دغه کمېسیون ویاند څرګنده کړه چې راستانه شوي کسان چې د تېر حکومت وزیران، مرستیالان، واليان، افسران او امنیه قوماندانان هم په کې شامل دي، د طالبانو په حکومت کې د دندو ژمنه نه ده شوې. پوښتنه دا ده، چې د تماس کمیسیون څه شی دی او کومې موخې تعقیبوي؟ یوازې څو میاشتې وروسته له دې چې طالبانو پر افغانستان واک تر لاسه کړ، د دې ډلې مشر حکومت د یوه سیاسي کمیسیون د جوړولو اعلان وکړ، چې له افغان شخصیتونو سره اړیکې ټینګې کړي او هغوی بیرته افغانستان ته وهڅوي. د دې کمیسیون مشري د شهاب الدین دلاور په غاړه وه چې د طالبانو یو له جګپوړو غړیو څخه و او د دې ډلې د کابینې اکثره وزیران هم په غړیو کې دي. دغه کمیسیون د خپل جوړیدو په لومړیو ورځو کې د پخواني حکومت له ټولو چارواکو او لوړ پوړو چارواکو وغوښتل چې افغانستان ته ستانه شي. اوس د دغه کمېسیون له جوړېدو شاوخوا دوه نیم کاله تېرېږي چې د دې کمېسیون د کړنو او موخو په اړه بېلابېل نظرونه راپورته کېږي. د طالبانو حکومت هېواد ته د پخوانيو چارواکو راستنېدو ته خوشبينه دی او وايي، چې د پخوانيو دولتي چارواکو او کارکوونکو د راستنېدو لپاره به خپلو هڅو ته دوام ورکړي. بل خوا د طالبانو یو شمېر سیاسي مخالفین د طالبانو له لوري د سیاسي څېرو د رابللو موخه د دغه کمېسیون جوړېدل تبلیغات ګڼي. د طالبانو منتقدین هم دا وايي چې د عفوې له اعلان سره سم د طالبانو په واکمنۍ کې د افغانستان د پخواني حکومت یو شمېر چارواکي او کارکوونکي شکنجه شوي، نیول شوي او یا وژل شوي دي. بل خوا د طالبانو د تماس د کمیسیون په همغږي افغانستان ته راستانه شوي یو شمېر پخوانیو چارواکو رسنیو ته ویلي چې له دوی سره د طالبانو ځینې ژمنې نه دي پوره شوي. په همدې حال کې ځینې راپورونه دا هم په ډاګه کوي چې یو شمېر پخواني چارواکي چې افغانستان ته راستانه شوي د ځینو ستونزو له امله بیا نږدې او لرې هېوادونو ته کډوال شوي دي. د محدودیتونو شتون او د هیواد د سیاسي راتلونکي په اړه اندیښنې د تیر حکومت د چارواکو او کارکوونکو د مهاجرت یو له اصلي عواملو څخه ګڼل کیږي. که څه هم د طالبانو حکومت چارواکو، سیاستوالو او پخوانیو کارکوونکو ته د مصونیت او امنیت ژمنه کړې، خو دا باید په پام کې ونیول شي چې معافیت یوازې د ځان مصونیت او خوندیتوب پورې محدود نه دی. د نن ورځې په ژوند کې امنیت شاید د خوراکي خوندیتوب څخه تر ذهني امنیت پورې لومړني برخې شاملې دي، چې د هر یو نشتوالی د یو شخص په ژوند اغیزه کوي. دا چې له افغان شخصیتونو سره د طالبانو د تماس کمیسیون به له دې وروسته د خپلو اهدافو او پلانونو په تحقق کې څومره بریالی وي، د وخت په تېرېدو به یې ځواب روښانه شي.