مقامات حکومت طالبان خواستار ممنوعیت پخش موسیقی در بازارچه مرزی ترمذ شده‌اند.
به گزارش خبرگزاری معمار به نقل از نشریه تایمز آف سنترال اشیا ((timesca، مقامات حکومت طالبان از ازبیکستان خواسته‌اند تا کنسرت‌ها و برنامه‌های موسیقی در بازار مشترک مرزی ترمذ را لغو کنند. گفته شده که در صورت ادامه برنامه‌ها، اتباع افغانستان اجازه ورود به این بازار را نخواهند داشت.
طالبان و یا مقامات ازبیکستان به گونه رسمی درباره این موضوع اظهار نظری نکرده‌اند.
براساس گزارش‌ها، بازارچه مرزی مشترک افغانستان و ازبیکستان در ترمذ که اخیراً بازگشایی شده است، کنسرت‌های موسیقی را با اجرای هنرمندان ازبیک برگزار می‌کند.
در توافقنامه بین حکومت سرپرست و ازبیکستان، شهروندان افغانستان می‌توانند به مدت ۱۵ روز بدون ویزا از بازار بین‌المللی ترمذ بازدید کنند.
گفتنی است بازار بین‌المللی ترمذ، در شهر ترمذ ولایت سرخان‌دریای ازبیکستان ساخته شده و در آن تاجران افغانستان نیز فعالیت دارند.
