وزارت خارجه تاجیکستان می‌گوید که هیاتی از این وزارت در جریان سفر به لندن با لئو دوچرتی، معاون امور خارجه بریتانیا در خصوص اوضاع افغانستان گفتگو کرده‌است.
به گزارش خبرگزاری معمار؛ در اعلامیه وزارت خارجه تاجیکستان آمده که در این گفتگو، طرفین در مورد طیف گسترده‌ای از موضوعات مورد همکاری دوجانبه در زمینه‌های سیاسی و اقتصادی، سرمایه‌گذاری و تجارت، تهدیدهای امنیتی مانند تروریزم و افراط‌گرایی تبادل نظر کردهاند.
اعلامیه افزوده که تقویت مرزها و حمایت فنی از پروژه‌ها و برنامه‌های انرژی سبز تاجیکستان و اهمیت سازماندهی سفرهای مقامهای عالی‌رتبه دو کشور از دیگر موضوعاتی بود که در این گفتگوی سیاسی مورد بحث و بررسی قرار گرفته‌اند.
وزارت خارجه تاجیکستان گفته است که در پایان این گفتگوی سیاسی، سران هیأت‌ها سند تفاهم همکاری بین وزارت امور خارجه جمهوری تاجیکستان و وزارت امور خارجه و توسعه بین‌المللی بریتانیای کبیر و ایرلند شمالی را امضا کردهاند.
به گفته این وزارت، هیأت‌های تاجیکستان و بریتانیا توافق کردند که به گفتگوی سازنده به منظور تقویت روابط در زمینه‌های مورد علاقه‌ی دوجانبه ادامه دهند.
