به گزارش خبرگزاری معمار، مولوی نور جلال جلالی، وزیر صحت عامهٔ حکومت سرپرست طالبان، با کِنیچی ماساموتو، سفیر جاپان در کابل دیدار کرد.
بر اساس اعلام وزارت صحت عامه، در این دیدار دو طرف دربارهٔ گسترش همکاری‌های جاپان با افغانستان به‌ویژه در بخش‌های ایجاد مراکز رادیولوژی، ارتقای ظرفیت کارمندان صحی، تداوی معتادین و جلوگیری از بیماری‌ها گفت‌وگو کرده‌اند.
وزیر صحت عامه در این نشست از حمایت‌های جاپان در بخش خدمات صحی قدردانی کرده و خواهان ادامهٔ همکاری‌های تخنیکی و مالی برای بهبود نظام صحی کشور شده است.
در مقابل، سفیر جاپان اطمینان داده است که توکیو به همکاری‌های خود با وزارت صحت عامه افغانستان ادامه می‌دهد و آماده است پروژه‌های بشردوستانه در حوزهٔ صحت را در سال‌های آینده نیز پشتیبانی کند.
