به گزارش خبرگزاری معمار، نهاد «دفاع» نشستی را با حضور ۷۰ زن و دختر مهاجر افغانستان در شهر دوشنبه، پایتخت تاجیکستان، برگزار کرده است. این نشست روز یک‌شنبه، ۹ قوس، با هدف شنیدن دیدگاه‌ها، تجربه‌ها و پیشنهادات زنان مهاجر برگزار شده است.
بر اساس بیانیهٔ این نهاد، در جریان این نشست بر اهمیت نقش سازمان ملل متحد در حمایت از مهاجران افغانستان تأکید شده و شرکت‌کنندگان مشکلات و نیازمندی‌های خود را در حوزه‌های مختلف مطرح کرده‌اند.
آریانا سعید، بنیادگذار نهاد «دفاع»، گفته است که تمام موضوعات مطرح‌شده با مقام‌های دولت تاجیکستان در میان گذاشته خواهد شد و روند پیگیری این موارد ادامه می‌یابد. او همچنین از دولت تاجیکستان خواسته است تا برای کودکان و دختران مهاجر افغانستان در شهر وحدت، یک مکتب ویژه ایجاد شود تا نیازهای آموزشی آنان برآورده گردد.
این نشست بخشی از تلاش‌های نهاد «دفاع» برای شنیدن صدای زنان مهاجر و انتقال مشکلات آنان به نهادهای مرتبط در تاجیکستان است.
