به گزارش خبرگزاری معمار، خبرگزاری آسیاپلس تاجیکستان روز پنج‌شنبه، ۱۹ سرطان، به نقل از منابع رسمی در دوشنبه گزارش داده است که هیچ شواهدی مبنی بر اخراج پناه‌جویان افغان از این کشور وجود ندارد و ادعاهای اخیر در این زمینه نادرست است.
این گزارش به نقل از مصور بهادری، رییس کمیته پناه‌جویان افغانستان در تاجیکستان، و همچنان سفارت افغانستان در دوشنبه تهیه شده است. به گفته بهادری، تا اکنون هیچ پناهنده‌ای به این کمیته درباره اخراج اجباری یا تهدید به ترک خاک تاجیکستان شکایت نکرده است.
سفارت افغانستان در دوشنبه نیز این ادعاها را رد کرده و گفته که هیچ‌گونه اطلاع یا مدرکی در مورد اقدام پولیس تاجیکستان برای اخراج پناه‌جویان افغان دریافت نکرده‌اند.
پیش از این، برخی رسانه‌های محلی و منطقه‌ای گزارش داده بودند که مقام‌های تاجیکستان برای مهاجرین افغان ضرب‌الاجل ۱۵ روزه برای خروج از کشور تعیین کرده‌اند؛ اما این گزارش‌ها از سوی منابع رسمی تأیید نشده است.
در حالی که جریان بازگرداندن مهاجران افغان از کشور های همسایه به‌شکل گسترده ادامه دارد، گمانه‌زنی‌ها در مورد احتمال اجرای سیاست مشابه در تاجیکستان نیز نگرانی‌هایی را در میان افغان‌های مقیم این کشور به میان آورده بود.
با این حال، منابع رسمی در دوشنبه تلاش کرده‌اند با ارائه اطلاعات شفاف، فضای نگرانی را کاهش دهند.
