به گزارش خبرگزاری معمار ؛ مولوی عبدالکبیر، معاون سیاسی ریاست الوزرا، امروز با شماری از کارمندان نظارت تعلیمی مرکز و ولایات وزارت معارف دیدار کرد.
دفتر مطبوعاتی معاونیت سیاسی ریاست الوزرا با نشر خبرنامه ای نوشت در این دیدار، کارمندان نظارت تعلیمی از تغییرات اخیر در تشکیلات اداری وزارت معارف ابراز نگرانی کردند و گفتند که بر اساس فیصله وزارت، ریاست نظارت از بین رفته است و تمام کارمندان آن در سایر ریاست‌های وزارت معارف گماشته شده‌اند.
آنان خواستار تطبیق نخستین طرح امارت اسلامی در تشکیل وزارت معارف شدند و در این بخش پیشنهادات خود را با معاون سیاسی ریاست الوزرا شریک ساختند.
مولوی عبدالکبیر، معاون سیاسی ریاست الوزرا، معارف را برای افغانستان روشن و پیشرفته مهم خواند و گفت که وزارت معارف با داشتن ظرفیت بلند در بخش تعلیمات دینی و عصری، فعالیت‌های مهمی را انجام داده است.
وی افزود که به اساس پالیسی امارت اسلامی، هیچ‌کارمند در وزارت معارف از وظیفه‌اش سبکدوش نمی‌شود و درصورت تغییرات در جاهای مناسب دیگر توظیف خواهند شد.
