به گزارش خبرگزاری معمار، منابع آگاه در وزارت خارجهٔ حکومت سرپرست طالبان می‌گویند که در جریان دیدارهای اخیر هیئت تاجیکستانی با مقام‌های طالبان در کابل، درخواست به‌رسمیت‌شناسی رسمی حکومت طالبان و همچنین واگذاری سفارت افغانستان در دوشنبه، از محورهای اصلی گفت‌وگوها بوده است.
به گفتهٔ این منابع، طالبان در این دیدارها از طرف تاجیکستان خواسته‌اند که نمایندگی دیپلماتیک افغانستان در دوشنبه را به آنان تسلیم کند؛ اما هیئت تاجیکستانی تاکنون واکنش روشن و مشخصی به این درخواست نشان نداده است.
این مذاکرات در حالی صورت می‌گیرد که روابط میان طالبان و تاجیکستان در چند سال گذشته پرتنش بوده است. دوشنبه بارها به صورت علنی از گروه‌های مخالف طالبان حمایت کرده و این موضوع سبب تیرگی روابط میان دو کشور شده بود.
با وجود تلاش‌های دوامدار طالبان برای کسب به‌رسمیت‌شناسی جهانی، اکثر کشورهای منطقه و غربی تاکنون از این کار خودداری کرده‌اند. طالبان واگذاری نمایندگی‌های دیپلماتیک افغانستان را یکی از پیش‌شرط‌های مهم در تعاملات سیاسی با دولت‌ها می‌دانند و تلاش دارند کنترل کامل بر سفارتخانه‌ها را در دست بگیرند.
