مقامات تاجیکستان اظهارات اخیر نماینده ویژه روسیه در امور افغانستان مبنی بر مخالفت این کشور با حضور افغانستان در سازمان همکاری شانگهای را رد کردند.
به گزارش خبرگزاری معمار؛ وزارت امور خارجه تاجیکستان با صدور بیانیه‌ای اعلام کرد که دوشنبه هرگز با از سرگیری فعالیت گروه تماس سازمان همکاری شانگهای – افغانستان که به منظور تسهیل گفتگو و همکاری میان کشورهای عضو این سازمان و افغانستان تشکیل شده بود، مخالفت نکرده است.
در این بیانیه آمده است: “تاجیکستان در چارچوب سازمان همکاری شانگهای همواره بر ضرورت گفتگو در مورد مسائل افغانستان تأکید کرده و هرگز با فعالیت‌های این گروه مخالفت نکرده است.”
بیانیه همچنین خاطرنشان می‌کند که تاجیکستان در نشست اخیر وزرای خارجه سازمان همکاری شانگهای پیشنهاد کرده بود که “بحث کارشناسی درباره مسائل افغانستان در قالب گروه تماس سازمان همکاری شانگهای – افغانستان آغاز شود.
این تکذیبیه پس از آن صادر می‌شود که ضمیر کابلوف، نماینده ویژه روسیه در امور افغانستان، گفته بود که تاجیکستان تنها عضو SCO است که با از سرگیری فعالیت گروه تماس SCO-افغانستان مخالفت می‌کند.
