رئیس مرکز مطالعات استراتژیک تاجیکستان خبر داد که شمار پاسگاه‌های مرزی این کشور با افغانستان افزایش یافته است.
خیرالدین عثمان‌زاده، رئیس مرکز مطالعات استراتژیک تاجیکستان گفت تعداد پاسگاه‌ها در مرز افغانستان از ۱۰۰ پاسگاه فراتر رفته و برخی از آنها با کمک سازمان‌های جهانی ساخته شده‌اند.
وی توضیح داد ما روابط اقتصادی با افغانستان را متوقف نمی‌کنیم، زیرا این همکاری ماهیت بشردوستانه دارد و حمایت از مردم افغانستان مهم است.
به گفته وی، تاجیکستان تمام دهلیزها را در اختیار کشورهای همسایه و سازمان‌های بین‌المللی برای ارسال کمک به افغانستان قرار داده، با این حال، سیاست این کشور در قبال دولت طالبان در افغانستان تغییر نکرده است.
رئیس‌جمهور تاجیکستان از زمان روی کار آمدن طالبان بارها اعلام کرده که این گروه را به رسمیت نمی‌شناسد و باید حکومتی فراگیر در افغانستان تشکیل شود.
براساس گزارش بخش روسی رادیو آزادی، خیرالدین عثمان‌زاده می‌گوید تاجیکستان هنوز منتظر تشکیل یک حکومتی فراگیر در افغانستان و احترام به حقوق اساسی و آزادی همه اقوام در افغانستان است.
مرکز تحقیقات راهبردی تاجیکستان که زیر نظر امامعلی رحمان، رئیس‌جمهور این کشور فعالیت می‌کند، اعلام کرده که دلیل افزایش تعداد پاسگاه‌های مرزی در سراسر مرز با افغانستان هم به دلیل تهدیدات امنیتی و افزایش قاچاق مواد مخدر است.
پیش از این حبیب‌الله وحیدزاده، رئیس اداره مبارزه با مواد مخدر تاجیکستان گفته بود با وجود اظهارات مکرر طالبان در مبارزه با مواد مخدر، واقعیت چیز دیگری است. او روز چهارشنبه (۱۱ اسد) در یک نشست خبری در دوشنبه گفت آمارها نشان می‌دهد که قاچاق مواد مخدر از افغانستان افزایش یافته است.
