به گزارش خبرگزاری معمار، مقامات تاجیکستان اخراج گروهی از مهاجران افغانستان را تأیید کرده‌اند. به نقل از رسانه آذربایجانی «کالیبر»، در بیانیه‌ای که تاریخ ۱۹ جولای از سوی مرکز مطبوعاتی نیروهای مرزی کمیته دولتی امنیت ملی تاجیکستان منتشر شده، آمده است که این اقدام به‌دلیل نگرانی‌های امنیتی، قاچاق مواد مخدر و دیگر تخطی‌های مهاجرتی انجام شده است.
هرچند در این اعلامیه صراحتاً از نام افغانستان یاد نشده، اما منابع رسانه‌ای تأیید می‌کنند که شهروندان افغان بخشی از اخراج‌شدگان هستند. بیانیه رسمی نیروهای امنیت ملی تاجیکستان بیان می‌دارد: «با توجه به پیچیدگی وضعیت ژیوپولیتیکی کنونی، شمار زیادی از اتباع خارجی، از جمله شهروندان افغانستان، به‌صورت غیرقانونی یا بدون رعایت مقررات اقامت در تاجیکستان حضور دارند.»
این اقدام در حالی صورت می‌گیرد که نگرانی‌های سیاسی، امنیتی و اقتصادی در منطقه افزایش یافته است و کشورهایی چون تاجیکستان سیاست‌های سخت‌گیرانه‌تری در قبال مهاجرین اتخاذ می‌کنند.
مقام‌های تاجیک بارها از گسترش نفوذ گروه‌های افراطی و قاچاقچیان مواد مخدر در مرزهای جنوبی این کشور ابراز نگرانی کرده‌اند و اخراج مهاجران غیرقانونی را بخشی از اقدامات پیش‌گیرانه امنیتی عنوان می‌کنند.
