به گزارش خبرگزاری معمار؛ معین وزارت زراعت اوزبیکستان می‌گوید که سطح دادوستد تجاری میان اوزبیکستان و اداره طالبان در سال‌های اخیر به‌گونه چشم‌گیر افزایش یافته و از ۴۱۰ میلیون دالر به ۶۱۰ میلیون دالر رسیده است. به گفته او، تاشکند خواهان گسترش همکاری‌ها در بخش‌های مختلف زراعت با افغانستان می‌باشد.
صدراعظم عثمانی، معین وزارت زراعت و مالداری طالبان، روز یک‌شنبه (۹ قوس) در دیدار با جمشید عبدوذوکروف، همتای اوزبیکستانی‌اش، تأکید کرده که افغانستان آماده تقویت روابط اقتصادی با اوزبیکستان است. او افزوده که سکتور خصوصی کشور توانایی تولید و صادرات گوشت را دارد و می‌تواند نیازمندی‌های اوزبیکستان را برآورده سازد.
عثمانی همچنان پیشنهاد کرده است که برای سرعت‌بخشیدن به روند صادرات گوشت، اوزبیکستان فارم‌های بزرگ و معیاری در داخل افغانستان ایجاد کند تا این روند به‌شکل منظم ادامه یابد.
در همین‌حال، طالبان به نقل از معین وزارت زراعت اوزبیکستان گفته‌اند که هدف سفر هیئت اوزبیکستانی به افغانستان، «خریداری گوشت، ایجاد باغ‌ها در ولایت فاریاب و همکاری در بخش تخم‌های بذری» می‌باشد. به گفته مقام‌های اوزبیک، این کشور مایل است همکاری‌های زراعتی و مالداری را با افغانستان در سطح گسترده‌تر دنبال کند.
