به گزارش خبرگزاری معمار، نمایندگان ویژه اتحادیه اروپا و کشورهای آسیای مرکزی روز چهارشنبه در دوشنبه، پایتخت تاجیکستان، در یک نشست مهم درباره وضعیت افغانستان گفت‌وگو کردند.
وزارت خارجه تاجیکستان در بیانیه‌ای اعلام کرده است که این نشست تحت عنوان «ششمین نشست» نمایندگان ویژه کشورهای آسیای مرکزی و اتحادیه اروپا برگزار شد. در این نشست، وضعیت حقوق بشر و شرایط زنان افغان به‌طور ویژه مورد بحث و بررسی قرار گرفت.
شرکت‌کنندگان در این نشست دیدگاه‌های خود را درباره تحولات اجتماعی، اقتصادی و سیاسی افغانستان از زمان برگزاری نشست قبلی در فبروری ۲۰۲۴ مطرح کردند. آنها همچنین در خصوص کمک‌های کشورهای آسیای مرکزی و اتحادیه اروپا به افغانستان و راه‌های ممکن برای همکاری بیشتر تبادل نظر کردند.
وزارت خارجه تاجیکستان افزود که نمایندگان دو طرف همچنین در مورد وضعیت حقوق بشر، به‌ویژه حقوق زنان و دختران افغانستان، و چالش‌ها و تهدیدات امنیتی موجود در کشور تبادل نظر کردند.
