د معمار پرس د خبر له مخې؛ ۱۷۴ افغان اتباع، چې ډیری یې په خطر کې وو او ژمنه یې کړې وه چې د جرمني لخوا به ومنل شي، د پنجشنبې په ورځ، د حمل په ۷مه په یوه الوتکه کې جرمني ته ولیږدول شول.
هغه الوتکه چې دوی یې لیږدول د هانوفر په هوايي ډګر کې ښکته شوه.
د دویچه ویله تلویزیون د راپور له مخې، دغو کسانو مخکې د جرمني حکومت څخه د منلو ژمنې ترلاسه کړې وې.
په دې ډله کې ۸۲ ښځې او ۹۲ نارینه شامل دي، چې له دې ډلې څخه ۷۴ یې د ۱۸ کلونو څخه کم عمر لري، او همدارنګه ۹ ماشومان هم شته چې عمرونه یې له دوو کلونو څخه کم دي.
د جرمني د کورنیو چارو وزارت ویاند اعلان وکړ چې امنیت د دې ډلې لپاره لومړیتوب دی او دا ټول کسان په خورا احتیاط سره امنیتي معاینات شوي دي.
