د معمار خبري آژانس د راپور له مخې؛ سانجي ویجسکرا، د جنوبي اسیا لپاره د یونیسف سیمهییز رییس، کابل ته د خپل سفر پر مهال د ماشومانو د خوارځواکۍ د درملنې له یوه مرکز څخه لیدنه کړې او په افغانستان کې یې د ښځینه روغتیايي کارکوونکو پر حضور او ملاتړ ټینګار کړی دی.
هغه په خپل پیغام کې ویلي دي چې ښځینه روغتیايي کارکوونکې د ماشومانو او میندو د روغتیايي اړتیاوو د پوره کولو لپاره حیاتي رول لري او پرته له هغوی د اغېزمنو روغتیايي خدمتونو وړاندې کول ممکن نه دي. نوموړي زیاته کړې چې د دې قشر ملاتړ او د هغوی د ظرفیت لوړونې لپاره پانګونه، د خوارځواکۍ پر وړاندې د مبارزې او د ماشومانو د روغتیا د ښهوالي لپاره یو مهم او اساسي ګام دی.
دا په داسې حال کې ده چې د طالبانو لهخوا د ښځو پر کار د لګېدلو محدودیتونو وروسته، روغتیايي خدمتونو ته لاسرسی، په ځانګړي ډول د ښځو او ماشومانو لپاره، له جدي ستونزو سره مخ سوی دی.
یونیسف تل په افغانستان کې د ماشومانو د روغتیا او خوارځواکۍ د وضعیت په اړه خبرداری ورکړی او د دې بشري بحران د هواري لپاره یې د بیړنیو او دوامدارو اقداماتو غوښتنه کړې ده.
