د معمار خبری آژانس د راپور له مخې؛ د ملګرو ملتونو د ماشومانو د ملاتړ صندوق (یونیسیف) خبرداری ورکړی چې د نړيوالو بحرانونو د زیاتېدو او د بشردوستانه بودجې د کمېدلو په پایله کې د ماشومانو اساسي اړتیاوې په ټوله نړۍ کې تر ټولو لوړې سطحې ته رسېدلې دي.
دغه ادارې په یو راپور کې اعلان کړی چې د ۲۰۲۶ کال لپاره ۷.۶۶ میلیارد ډالرو بودجې ته اړتیا لري څو وکولای سي ۷۳ میلیونه ماشومانو ته په ۱۳۳ هېوادونو او سیمو کې حیاتي خدمتونه وړاندې کړي.
کاترین راسل، د یونیسف اجرائیوي رئیسې، ویلي چې ماشومان په ټوله نړۍ کې، په ځانګړي ډول په جګړهځپلو سیمو، طبیعي پېښو، اقتصادي بحرانونو او بېځایه کېدو کې، له بېسارې ستونزو سره مخ دي او بیړنیو مرستې ته اړتیا لري.
هغې زیاته کړې: «سخت بشري بحرانونه په پراخېدو دي، خو زموږ سرچینې د دې بحرانونو د مخنیوي لپاره کمې سوې دي. که اړینې سرچینې برابرې نسي، د میلیونونو ماشومانو ژوند به له جدي خطر سره مخ سي.»
یونیسف خبرداری ورکړی چې که دغه بودجه برابره نسي، د ژغورنې ګڼ شمېر پروګرامونه، لکه تغذیه، زدهکړه، د څښاک اوبه او روغتیایي پاملرنه به ودرول سي، او دا کار به د لا پراخ بشري بحران لامل سي
