د معمار خبری آژانس د راپور له مخې، د افغان کډوالو د جبري ایستلو او ستنېدو لړۍ په دوام کې، د طالبانو رسمي سرچینو ویلي چې یوازې د تېرې یکشنبې په ورځ (د عقرب ۱۱مه)، له بېلابېلو پولو څخه له ۲۸۰۰ څخه زیاتې افغان کورنۍ هېواد ته ستنې سوې دي.
د افغان کډوالو د ستنېدو دا نوې څپه د پاکستان او نورو ګاونډیو هېوادونو د سخت دریځو پالیسیو پایله ده. د طالبانو تر کنټرول لاندې رسنیو راپور ورکړی چې یوازې په یوه ورځ کې ۲۸۵۸ افغان کورنۍ له بېلابېلو لارو، لکه پل ابریشم، اسلامقلعه، سپین بولدک، تورخم او بهرامچې له لارې بېرته افغانستان ته داخلې سوې دي. په همدې مهال، د پاکستان چارواکو د افغان کډوالو پر وړاندې خپل فشارونه لا سخت کړي دي.
د پاکستان د دفاع وزیر په څرګنده ویلي چې هېواد یې نور د «میلمهپالنې درنه بیه» نه سي ورکولی او له میلیونونو افغان کډوالو یې غوښتنه کړې چې بېرته خپل هېواد ته ستانه سي. دا په داسې حال کې ده چې ډېری ستنېدونکي کورنۍ په افغانستان کې له سختو اقتصادي ستونزو، د استوګنې له نشتوالي او د لومړنیو اړتیاوو له کمښت سره مخ دي. نړيوالو بنسټونو بيا بيا خبرداری ورکړی چې د کډوالو د جبري ستنېدو دا لړۍ کولی سي په افغانستان کې د يو نوې انسانی ناورین سبب سي.
