د معمار خبري آژانس د راپور له مخې، انتونیو ګوتریش، د ملګرو ملتونو عمومي منشي، له ټولو هېوادونو غوښتنه کړې چې یو ځل بیا د نړیوالې همکارۍ او یووالي ژمنتیا څرګنده کړي او د پیاوړتیا لپاره یې ګډ کار وکړي.
ګوتریش د جمعې په ورځ، د اکتوبر پر ۲۴مه، د ملګرو ملتونو د ورځې په مناسبت په خپل پیغام کې ویلي چې اوسنی نړۍ له ګڼو ننګونو سره مخ ده له جګړو او شخړو نیولې تر اقلیمي بحران، د کنټرول نه وتلو ټکنالوژیو، او د څو اړخیز نظام پر ضد ګواښونو پورې.
هغه زیاته کړه چې اوس نړۍ تر هر بل وخت ډېر د اتحاد او ګډ کار اړتیا لري، څو هغه ستونزې حل کړي چې هېڅ یو هېواد یې یوازې نه سي حلولی. هغه په خپل پیغام کې ویلي: «ملګري ملتونه یوازې یوه اداره نه ده، بلکې یوه ژوندۍ وعده ده داسې وعده چې پولې او وچې یې سره نښلولي او نسلونو ته یې الهام بخښلي دي.
په تېرو اتیا کلونو کې موږ د سولې د ټینګېدو، د فقر او لوږې پر ضد د مبارزې، د بشري حقونو د ودې، او د یوې دوامدارې نړۍ د جوړولو لپاره هڅې کړي دي.» د ملګرو ملتونو عمومي منشي دا ورځ د دې ادارې له منشور سره د بیا ژمنېدو یوه ښه موقع بللې او ټینګار یې کړی: «راځئ چې یو موټی سو او د ملګرو ملتونو دا حیرانونکې وعده پوره کړو. کله چې موږ انسانان د یووالي پرېکړه وکړو، هېڅ شی ناممکن نه وي.»
