د معمار پرس د خبر له مخې؛ دا خبره په کابل کې د ایران د اسلامي جمهوریت سفارت اعلان کړې ده چی د افغانستان پخواني ولسمشر حامد کرزي د افغانستان په چارو کې د ایران له ځانګړي استازي حسن کاظمي قمي سره په کتنه کې د سیمې له هېوادونو په ځانګړې توګه له ایرانه وغوښتل چې د افغانستان د ستونزو د هواري لپاره سیمه ییز اقدام وکړي.
په هغې خبرپاڼه کې چې د ايران د سفارت له خوا خپره شوې ويل شوي دي چی ښاغلي کرزي د ایران د مرستو څخه د افغانستان له خلکو سره د یوه ورور او ګاونډي هېواد په توګه قدرداني وکړه.
هغه د افغانستان ستونزې ته د سیمې د هېوادونو په ځانګړې توګه د ایران د پاملرنې او د افغانانو د ستونزو د هواري لپاره د سیمه ییز ابتکار د وړاندې کولو غوښتنه وکړه.
