چین: له افغانستان سره به د ښه ګاونډیتوب پر بنسټ همکاري دوام ومومي

د معمار پرس د خبر له مخې؛ په چین کې د طالبانو سفارت اعلان وکړ چې په بیجینګ کې د طالبانو سفیر بلال کریمي د چین د بهرنیو چارو وزارت د آسیایي څانګې له مشر ماومینګ سره ولیدل او د سیاسي، اقتصادي، سوداګرۍ، ټرانزیټ او قونسلګرۍ مسلو په اړه یې خبرې وکړې. په چین کې د طالبانو د سفارت د مطبوعاتي اعلامیې له مخې، کریمي په غونډه کې ادعا وکړه چې د طالبانو له واکمنۍ وروسته، د افغانستان په ټول هیواد کې امنیت ډاډمن شوی دی، او په هیواد کې دوامداره ثبات د ټولو خواوو په ګټه دی. په مقابل کې، ښاغلي ماومینګ ټینګار وکړ چې چین به د ښه ګاونډیتوب پر بنسټ له افغانستان سره خپلې همکارۍ ته دوام ورکړي او هڅه کوي چې دا اړیکې په مختلفو برخو کې پراخې کړي.