د معمار پرس د خبر له مخې؛ د برازیل په ریو دي جنیرو کې د بریکس په ۱۷مه سرمشریزه کې، د چین صدراعظم لي چیانګ په دغو هیوادونو غږ وکړ چې د مسؤلیت او یووالي سره د نړیوال حکومتدارۍ جوړښت په اصلاح کې مخکښ رول ولوبوي.
سرمشریزه د “سولې او امنیت، د نړیوالې حکومتدارۍ اصلاح” تر عنوان لاندې ترسره شوه او د برازیل ولسمشر لولا یې مشري کوله.
لی چیانګ، چې د چین د ولسمشر شي جین پینګ په استازیتوب یې په سرمشریزه کې وینا وکړه، وویل چې نړۍ د بې ساري پرمختګونو شاهده ده چې نړیوال نظم یې ټکان ورکړی او د څو اړخیزو ادارو اغیزمنتوب یې کم کړی دی.
د چین صدراعظم زیاته کړه چې د بریکس هیوادونه، د نړیوال سویل د مهمو استازو په توګه، باید د خپلواکۍ ساتلو او د اجماع رامینځته کولو له لارې د نړیوال حکومتدارۍ سیسټم کې د اصلاحاتو لپاره یو محرک ځواک شي.
