د معمار خبری آژانس په وینا؛ د چین سفارت په تاجیکستان کې په یوه اعلامیه کې له ټولو میشتو چینایي وګړو غوښتي چې ژر تر ژره د افغانستان له پولو سره پرتې سیمې پرېږدي. دغه خبرداری له هغه وروسته ورکړل سوی چې د تاجیکستان او افغانستان په ګډه پوله کې څو مرګوني پېښې رامنځته سوي دي. د چین سفارت اعلان کړی چې د تېرې یوې اوونۍ په جریان کې، پنځه چینایي اتباع د افغانستان له خاورې څخه د مرزي بریدونو په نتیجه کې وژل سوي او پنځه نور ټپیان سوي دي.
په دې خبرپاڼه کې ویل سوي چې د چینایي اتباعو امنیت د افغانستان سره پولو ته نږدې سیمو کې له جدي ګواښ سره مخ دی او لازمه ده چې ټول اتباع ژر تر ژره له دغو سیمو ووځي او سخت احتیاطي اقدامات ترسره کړي. تر دې وړاندې د تاجیکستان ولسمشری دفتر هم په یوه اعلامیه کې وروستي مرزي بریدونه «پارونکو او غیرقانوني» بللي وو او د پولو د امنیت د لا پیاوړي کولو غوښتنه یې کړې وه. دا رسمي خبرداری د چین له لوري په داسې وخت کې ورکول کېږي چې د افغانستان په شمالي پولو کې د وسلوالو او سخت دریځو ډلو د فعالیت د پراخېدو په اړه اندېښنې زیاتې سوې دي.
