د اسلامي امارت د مشرتابه د مقام د ځانګړي استازي مولوي احمد جان بلال، په مشرۍ د خصوصي سکټور د ستونزو اورېدلو کمېټې مسؤلینو د خصوصي پوهنتونونو او ښوونځیو له استازو سره بحث او خبري وکړې.
په دغه ناسته کي، چي د مالیې وزارت په خیبر صالون کې ترسره شوه؛ د خصوصي پوهنتونونو او ښوونځیو استازو د مالیاتو ورکولو ته د ژمنتیا څرګندولو ترڅنګ، خپلې ټولې مالیاتي ستونزي، وړاندیزونه او حل لارې د کمېټې له مسؤلینو سره شریکې کړې او په دې برخه کې يې د اسلامي امارت د ځانګړې پاملرنې غوښتنه وکړه.
د مالیې وزارت د ځانګړي کمېټې غړو، د تعلیمي او تحصیلي بنسټونو پیاوړي کول د هېواد پیاوړتیا وبلله او د خصوصي پوهنتونونو او ښوونځیو د ملاتړ او پرمختګ په موخه يې د اړینو آسانتیاوو په رامنځته کولو ټینګار وکړ.
همدا راز ژمنه وشوه، چې د خصوصي پوهنتونونو او ښوونځیو لپاره د اړینو آسانتیاوو د رامنځته کولو سره به، یاد بنسټونه ولس ته د ښو خدمتونو په وړاندې کولو کې هم آسانتیاوې رامنځته کوي، تر څو غوره تعلیمي او تحصیلي خدمتونه وړاندې شي.
د یادونې وړ ده، چي ځانګړې کمېټه به یادې ستونزې او حل لارې د اسلامي امارت له اداري کمېسیون سره شریکي کړي او بیا به د تائید په موخه د مشرتابه محترم مقام ته وړاندې شي.
