د معمار خبري اژانس د راپور له مخې؛ د طالبانو د بهرنیو چارو وزارت ویلي چې د دوحې د خصوصي سکتور د کاري ډلې درېیمه غونډه په کابل کې د ملګرو ملتونو د معاونت هیأت (یوناما) په کوربتوب په حضوري او انلاین بڼه ترسره سوه.
د طالبانو د ادارې د بهرنیو چارو وزارت ویلي دي چې دغه غونډه د کابل په هوټل کې ترسره سوې، او پکښې د بهرنیو چارو، مالیې، صنعت او سوداګرۍ، اقتصاد، کار او ټولنیزو چارو وزارتونو او د افغانستان مرکزي بانک استازي، د یوناما استازي، د ملګرو ملتونو اړوند دفترونو ، سیمهییزو او نړیوالو ادارو، سفیران او د بېلابېلو هېوادونو کارپوهانو ګډون کړی و.
د وزارت د خبرپاڼې له مخې، دغه غونډې دوه برخې درلودې: وده او شاملول، او همدارنګه همغږي او روڼتیا.
د طالبانو د بهرنیو چارو وزارت په وینا، دغه غونډې دوه برخې درلودې، چې یوه یې وده او ګډون، او بله یې همغږي او روڼتیا وه.
د طالبانو د بهرنیو چارو وزارت په خبرپاڼه کې راغلي چې په دې غونډه کې ټولو اړخونو پر زیاتې همغږۍ ټینګار وکړ او د موجوده ستونزو په اړه یې ځینې حل لارې وړاندیز کړې، او همدارنګه یی د افغانستان سره د همکارۍ د دوام ډاډ ورکړ.
تر دې دمه یوناما د دې غونډې په اړه څه نه دي ویلي.
