د معمار خبري اژانس د راپور له مخې، مجید رضاپناه، د ایران د اسلامي جمهوریت قونسل په ننګرهار کې، په یوې خبري ناستې کې وویل چې ایران او افغانستان ګډ دښمنان لري او بهرني هېوادونه د اقتصادي بندیزونو په تطبیق سره هڅه کوي چې دواړه هېوادونه کمزوري کړي.
هغه وویل: «ایران او افغانستان له ورته ګواښونو سره مخ دي او د دې فشارونو پر وړاندې مبارزه د دواړو خواوو همکارۍ او یووالي ته اړتیا لري.»
د ایران سرقونسل په خپلو خبرو کې زیاته کړه چې د کلونو ناامنۍ وروسته، اوس په افغانستان کې ټولپوښ امنیت ټینګ سوی او وخت رارسېدلی چې د اقتصادي ودې او پرمختګ لپاره ګډ او عملي اقدامات ترسره سي.
هغه همدارنګه وویل: «ایران د افغانستان د خلکو او حکومت ترڅنګ ولاړ دی او چمتو دی چې د دې هېواد اقتصادي پرمختګ په مسیر کې هر اړخیزه همکاري وکړي. د افغانستان هوساینه او ثبات د ایران د ګټو سره تړلی ده.»
سرقونسل د ایران د نوي نمایندګۍ له خوا هم د ننګرهار په ولایت کې د دوامداره همکارۍ خبر ورکړ او ویی ویل چې ایران په دې ولایت کې د شکرې ناروغۍ د درملنې لپاره یو مجهز روغتون جوړ کړی او په روغتیا، يخچالونو، مسلکي مرکزونو، تخنیکي او نورو برخو کې به خپلې همکارۍ جاري وساتي.
بلخوا، په همدې خبري ناسته کې د ننګرهار د طالبانو محلي چارواکو د ایران د سوداګریزو او اقتصادي برخو د پراخې او دوامداره همکارۍ غوښتنه وکړه.
عبدالبصیر پاچا، د ننګرهار ولایت د طالبانو د صنعت او سوداګرۍ رئیس، پر دې ټینګار وکړ چې د خلکو د اسانتیا لپاره د سوداګریزو لارو پراختیا ته باید لا زیات پام وسي.
