په خاوره او ژورو کې ریښې

اسراییلو په تیرو دوو میاشتو کې د فلسطین او لبنان د مقاومت د ډلو یو شمیر جنرالان او مشران شهیدان کړي دي. شهید سید حسن نصرالله د لبنان د حزب الله د انقلابی غورځنګ عمومی منشی، شهید اسماعیل هنیه، د فلسطیني ادارې پخوانی لومړی وزیر، شهید یحیی سنوار د حماس غورځنګ د سیاسي دفتر مشر او په لبنان کې د حزب الله جګپوړی قومندان فواد شکر د صهیونیسټانو د وروستیو حملو او وژنو د شهیدانو له مخکښو شخصیتونو څخه وو. د یوې لویې رواني جګړې په ترڅ کې غربي رسنۍ او سیاسي شنونکي دا وژنې د حماس او حزب الله پر ضد “وژونکې او تخریبي ګوزارونه” بولي او د دغو غورځنګو د برخلیک او ناڅرګندې راتلونکې او د مقاومت د جریان د خاموشۍ او تباهۍ او د اسرائیلو د پرېکنده بریا په اړه خبرې کوي. په داسې حال کې چې پورته ذکر شوي غورځنګونه او سازمانونه په ستر اسلامي ملت او د فلسطین او لبنان په ولسونو کې ریښې لري او په هیڅ شخص او اشخاصو تکیه نه کوي چي د یو جنرال په تللو سره کاروان حرکت ونه‌کړي او یا کمزورې شي. تر څو چې ستر اسلامي امت او د فلسطین او لبنان مقاومتي ملتونه ولاړ وي، د حماس او حزب الله غورځنګونه د پخوا په پرتله له غاصبینو او د هغوی د بهرنیو ملاتړو پر وړاندې به لا ډیر مبارزې ته دوام ورکړي. د تېرو ډېرو تجربو دا خبره ثابته کړې ده او دلته يې يو څو يادوو: شیخ احمد یاسین چې یو ړوند فلسطینی عالم او د فلسطین د اسلامي مقاومت غورځنګ (حماس) روحاني پلار و، په غزې تړانګه کې دغه ړوند بوډا او مذهبي مشر د اسرائیلي چورلکو په برید کي په ناحقه په شهادت ورسید. خو د حماس د دغه بنسټ ایښودونکي شهادت نه یوازې د فلسطین اسلامي مقاومت له منځه نه دی وړی او کمزوری کړی دی، بلکې د هغه شهادت د ماشومانو او ځوانو فلسطيني جنګياليو لپاره د رڼا څراغ وګرځېد او له دې پېښې وروسته حماس د مبارزې بيرغ پورته کړ. د فلسطین د اسلامي جهاد تنظیم مشر ډاکټر فتحی الشقاقي د موساد ترهګرو لخوا د «مالتا» په هیواد کې په شهادت ورسید. خو د هغه شهادت د دې سازمان د جنګیالیو هوډ ته کوم زیان ندی اړولی. ډاکټر عبدالعزیز الرنتیسي چې د حماس د غورځنګ یو جګپوړی مشر و، هم د اسرائیلي پوځیانو له خوا په شهادت ورسید. خو د هغه شهادت د حماس د جنګياليو او مجاهدينو په ليکو کې د ګډوډۍ لامل نه شوه. همدا ډول په تېرو دوو میاشتو کې د حماس غورځنګ د سیاسي دفتر او ساحوي مشرانو (شهید اسماعیل هنیه او شهید یحیی سنوار) شهادت به د مبارزې او مقاومت په ډګر کې هیڅ بدلون را نه وړي. ځکه چی اسلامي امت، فلسطيني ملت او د حماس سازمان تر ننه ولاړ دی او په سلهاو هنیه او سنوار به د دوی له نسلونو څخه پیدا شي. په لبنان کې د حزب الله د انقلابي غورځنګ په باره کی هم همداسې ده. د حزب الله د انقلابی غورځنګ دوهم عمومی منشی (شهید سید عباس موسوی) هم د اسرائیلو د الوتکی په توغندی وویشتل شو. خو د عباس موسوي له شهادت وروسته حسن نصرالله د هغه ځای ناستی شو او حزب الله یې په منځني ختیځ او عربي نړۍ کې په یوه زبرځواک بدل کړ او د اسرائیلو پوځ په ۳۳ ورځنۍ جګړه کې له ماتې او ستړیا سره مخامخ کړ. شهید عماد مغنیه (حاجی رضوان) چې د حزب الله جګپوړی قومندان وو او په ۳۳ ورځنۍ جګړه کې د اسرائیلي پوځ د ماتې لامل هم و، هم د موساد ترهګرو لخوا په دمشق کې ووژل شو. خو نن د حزب الله د جنګیالیو او قوماندانانو په لیکو کې په سلګونو (حاجی رضوان) شتون لري چې هر یو یې د صهیونیسټانو خوب خراب کړي دی. د هغه څه په اساس چې وویل شو، د فلسطین او لبنان د مقاومت د سازمانونو د مشرانو او جنرالانو وژل کیدل به د جګړې انډول او د مقاومت او استقرار ستراتیژي بدله نه کړي. د اشغال پر وړاندې مقاومت او د غرب د استکبار پر وړاندې ولاړ یو فکر او ایډیال دی د سیمې د ولسونو او د اسلامي امت په زړونو کې ځای لري او د اشخاصو او شخصیتونو په ګواهۍ سره به د حرکت او مقاومت د جبهې اصولو ته هیڅ ډول تخریب او زیان ونه رسیږي. هرکله چې د مقاومت بیرغ د یوه جنرال له لاس څخه لویږي، لسګونه نور جنرالان به یې پورته کوي. حتی که د (ناممکن انګیرنې له مخې) د امریکا، لویدیځ او اسراییلو مشران د مقاومت په ماتولو کې بریالي شي، د مقاومت او استکبار ضد بیرغ به په ځمکه کې پاتې نشي او نور جنرالان به د مسلمانانو د عزت او ناموس دغه بيرغ د احتراق په لور پورته کوي.