د معمار خبري اژانس د راپور له مخې؛
د سپوږمکۍ نوي انځورونه ښيي چې طالبانو د بګرام په هوايي اډه کې، چې په افغانستان کې د امریکا د متحدو ایالتونو تر ټولو لويه پخوانۍ پوځي اډه وه، د پوځي الوتکو انځورونه د هوايي ډګر پر رنوې رسم کړي دي.
واشنګټن پوسټ ورځپاڼې راپور ورکړی چې دا جعلي انځورونه ښايي د دې لپاره جوړ سوي وي چې د سپوږمکۍ څارونکي او شنونکي تیرباسي، څو په بګرام کې پوځي حضور یا فعالیت تر واقعي حالت ډېر وښيي.
د راپور پر بنسټ، د سپوږمکۍ انځورونه ښيي چې د بګرام اډه تر ډېره تشه ده او کار نه ترې اخېستل کېږي، او پکښې د پام وړ پوځي یا عملیاتي فعالیت نه تر سترګو کېږي.
کارپوهان وايي چې پر ځمکه د پوځي تجهیزاتو د جعلي انځورونو کارول هغه تکتیک دی چې عموماً د استخباراتي ګمراهۍ یا د بصري مخنیوی د رامنځته کولو لپاره کارول کېږي.
د بګرام هوايي اډه په ۲۰۲۱ کال کې د امریکايي ځواکونو له وتلو وروسته د طالبانو لاس ته ولوېده، او تر اوسه پورې د دې اډې د پراخ کارونې یا د پوځي زیربناوو د پراختیا په اړه کوم راپور نه دی خپور سوی.
د طالبانو دا اقدام د دې ډلې د احتمالي تبلیغاتي او پوځي موخو په اړه اندېښنې راپارولې دي.
