د معمار خبري آژانس د راپور له مخې؛ د ایران او افغانستان ګډه اقتصادي ناسته د ایران د خراسان رضوي ولایت د والي غلامحسین مظفري، د ایران د مرکزي بانک د رئیس محمدرضا فرزین، او د طالبانو تر مدیریت لاندې د افغانستان د مرکزي بانک رئیس نوراحمد آغا، په ګډون په کابل کې ترسره سوه.
په دې ناسته کې د ایران او افغانستان د ګډو بانکي فعالیتونو بهیر او د مالي راکړو ورکړو اړوند طرزالعملونه وڅېړل سول، او پر هغه لارو چارو بحث سوې چې له مخې یې رسمي مالي تبادلې اسانه او غیررسمي او خطر لرونکو لارو پورې تړلتیا کمه سي. د ناستې یو مهم بحث د دوغارون په آزاده سیمه کې چې د ایران او افغانستان پوله ده د افغانستاني بانکونو د یوې څانګې د جوړېدو وړاندیز وو، دا د دواړو هېوادونو د سوداګرۍ د اسانتیا لپاره یو عملي حل بلل سوی او د هغې تخنیکي او اداري اړخونه هم و ارزول سول. دواړو لورو د مالي اړیکو د پراختیا او د بانکي تبادلو د اسانتیا پر اهمیت ټینګار وکړ.
همدارنګه، د ناستې په څنډه کې د ایران د مرکزي بانک د رئیس او د طالبانو تر مدیریت لاندې د افغانستان د مرکزي بانک د رئیس نوراحمد آغا ترمنځ دوهاړخیزه لیدنه هم وسوه. په دې لیدنه کې یوازې د دوغارون موضوع نه، بلکې ګډ بانکي طرزالعملونه، د پیسو د لېږد چینلونه، او د تحریمونو په شرایطو کې د مالي تبادلو مدیریت هم و څېړل سول. دا خبرې اترې په داسې حال کې ترسره کېږي چې د تهران او کابل اقتصادي تعاملات په وروستیو میاشتو کې زیات سوي او دواړه لوري هڅه کوي چې رسمي مالي چینلونه فعال کړي، څو سوداګري اسانه کړي او د تحریمونو او بانکي محدودیتونو له ستونزو سره مقابله وسي.
