د معمار خبري اژانس راپور له مخې، هغه شمیر افغانان چې په امریکا کې مېشت دي، په واشنګټن کې د پاکستان سفارت مخې ته پراخ اعتراض وکړ. اعتراض کوونکو د پاکستان هوایي بریدونه چې په استوګنیزو سیمو سوي او د ملکي وګړو، ورزشکارانو او خبریالانو ژوند یې اخیستی دی، د سخت جرم په توګه وبلل او د اسلام آباد د ځواب ویلو غوښتنه یې وکړه.
اعتراض کوونکو له حقوقي او نړیوالو ادارو وغوښتل چې د پاکستان د هوایي بریدونو په اړه په کابل او سرحدي ولایتونو کې پلټنه وکړي. هغوی ویلي چې اسلام آباد په افغانستان کې بشري جرم ترسره کړی دی، خو طالبانو پرته له دې چې د خلکو وینه په پام کې ونیسی خپل پخواني ملاتړي ته یې د دوستۍ لاس ورکړی او د ملکي وګړو وینې ته توجه نه ده کړی.
دا په داسې حال کې ده چې پاکستان په دې ادعا چې د افغانستان له خاورې پر دې هېواد بریدونه کېږي، د کابل په ګډون په ډېرو ولایتونو کې موخې بمباران کړې، چې په پایله کې ملکي وګړي، د ښځو او ماشومانو، په ګډون وژل سوي دي.
