د طالبانو د عامې روغتیا وزیر نورجلال جلالي د سعودي عربستان د روغتیا له وزیر فهد عبدالرحمن الجلاجل او همدارنګه د پاکستان د روغتیا له وزیر سره د پولیو ناروغۍ د مخنیوي او کنټرول په اړه بحث کړی دی.
د عامې روغتیا وزارت په یوه خبرپاڼه کې ویلي، چې درې واړو لوریو د پولیو تر څنګ د ساري او غیرساري ناروغیو، د نشهيي موادو د ناوړه استفادې د مخنیوي، د کیفیت د تضمین په برخه کې همکارۍ او د نورو روغتیایي موضوعاتو په اړه مفصلې خبرې کړې دي. طالبانو ټینګار کړی، چې د ناروغیو د مخنیوي او د روغتیایي خدمتونو د ښه والي لپاره د سعودي عربستان او پاکستان له دولتونو سره همکارۍ ته چمتو دي.
یاده دې وي چې د پولیو ناروغي لا تراوسه په افغانستان او پاکستان کې له منځه نه ده تللې. د رسمي راپورونو له مخې، سږ کال لږ تر لږه دوه مثبت پېښې په بادغیس او هلمند ولایتونو کې ثبت سوې دي، او په پاکستان کې هم د دغې ناروغۍ شمېر زیات سوی دی.
د روغتیا چارواکو ویلي، چې سیمه ییزه همکاري او د ګاونډیو هېوادونو ترمنځ د تجربو تبادله د ناروغۍ د خپرېدو د کمولو او د ماشومانو د ساتنې لپاره حیاتي ارزښت لري.
