د معمار خبري اژانس د راپور له مخې؛ د احصایې او معلوماتو ملي ادارې ویلي چې د روان کال د قوس په میاشت کې د دې ادارې د هویت تثبیت او د آرشیف د تنظیم ریاست، ټولټال ۹ زره او ۱۰۲ کاغذي تذکرې تایید کړې دي.
د یادې ادارې د مطبوعاتي دفتر د خبرپاڼې له مخې، چې د سېشنبې په ورځ (د جدي ۹مه) خپره سوې، له دې شمېرې څخه ۲ زره او ۶۰۳ تذکرې په حضوري ډول او ۶ زره او ۴۹۹ تذکرې په غیرحضوري ډول د بهر مېشتو افغانانو لپاره تایید سوې دي.
همدارنګه، په همدې موده کې د ۲۰۵ زره او ۸۰۹ کسانو هویت هم تثبیت سوی دی.
د احصایې او معلوماتو ملي ادارې مسوولینو ټینګار کړی چې دا اقدامات د افغان وګړو لپاره د پېژندنې او نفوسثبت د خدمتونو د اسانتیا په موخه ترسره کېږي او د دې ادارې هڅې ښيي چې غواړي اداري بهیرونه ښه کړي او د هېواد دننه او بهر مېشتو هېوادوالو ملاتړ وکړي.
