په افغانستان کې د فقر د زیاتېدو په اړه د بحران نړیوالې ډلې اندېښنه

د معمار خبری آژانس د راپور له مخې، د بحران نړیوالې ډلې په یوه تازه راپور کې ویلي چې د بهرنیو مرستو کمښت د افغانستان هغه بی ثباته اقتصاد له جدي ستونزو سره مخ کړی چې له لسیزو جګړو او لوېدیځو بندیزونو څخه یې زیان لیدلی دی. د سرچینې په وینا، دغه وضعیت د هغو میلیونونو افغانانو ژوند له خطر سره مخ کړی چې په بشري مرستو تکیه لري. طالبانو له واک ته د بیا رسېدو وروسته د وران اقتصاد د بیا جوړیدو هڅې کړې دي، خو د نړیوال ملاتړ کمښت دغه هڅې شنډې کړې دي. د دې ادارې په وینا، ښځې او انجونې تر ټولو ډېر د عامه خدماتو له کمښت او د فقر له زیاتوالي زیان ویني. د بحران نړیوالې ډلې ټینګار کړی چې د افغانستان پر وړاندې د اقتصادي محدودیتونو کمول کولای سي ددې هېواد په ځان‌بسیا کیدو کې مرسته وکړي. دغه ادارې له نړیوالې ټولنې غوښتي چې خپلې تګلارې له سره وارزوي څو د افغانستان خلکو ته ملاتړ برابر او د بهرنیو مرستو پر ځای د ځان‌بسیا کیدو زمینه برابره کړي. ویل کیږي چې بندیزونه، د بهرنۍ پانګونې کمښت او د طالبانو له بیا واکمنېدو وروسته د بیکارۍ ډېرېدل د خلکو پر ژوند نور هم فشار زیات کړی دی. طالبانو تراوسه ددې راپور په اړه هېڅ غبرګون نه دی ښودلی.