د معمار خبری آژانس د راپور له مخې، د «کابل تر اتاوا: په افغانستان کې د جنسي آپارتاید د پای ته رسولو لپاره نړیوال یووالی» نړیواله غونډه پرون د کاناډا د پارلمان په ودانۍ کې ترسره سوه. دغه غونډه د ښځو او ماشومانو د څېړنیزې او عدالت غوښتنې شبکې په نوښت، د کاناډا د پارلمان د څو غړو په ملاتړ او د ډیپلوماتانو، سیاستوالو، نړیوالو سازمانونو او د ښځو د حقوقو فعالانو په ګډون جوړه سوې وه.
ګډونوالو د افغانستان ښځې او انجونې «د نړۍ له جدي جنسي تبعیض رژیمونو» لاندې یادې کړې او د طالبانو لهخوا لګول سوي محدودیتونه یې د «جنسي آپارتاید» څرګند بېلګه وبلله.
د غونډې اصلي موخه، د طالبانو سیاستونه د جنسي آپارتاید په توګه په رسمی ډول پیژندلو لپاره د نړیوالې اجماع رامنځته کول، د افغان ښځو غږ په نړیواله کچه لوړول، او د دې سیسټماتيک تبعیض په وړاندې د حساب ورکونې میکانیزمونو پیاوړي کول وو.
د غونډې په پرانیسته کې، د کاناډا پارلمان غړي علي احساسې په دې ټینګار وکړ چې د دولت او پارلمان ژمنه د افغان ښځو د حقوقو ملاتړ دی او د ملي او نړیوالو عدالت غوښتونکو هڅې یې وستایلې.
زرقا یفتلي، د ښځو او ماشومانو د څېړنیزې او عدالت غوښتنې شبکې مشرې، د نړیوال فشار او همغږۍ د دوام پر اهمیت ټینګار وکړ او غوښتنه یې وکړه چې هېوادونه باید د جنسي آپارتاید د پای ته رسولو لپاره عملي ګامونه واخلي.
په غونډه کې روبینا همدرد د شبکې د څېړنیز راپور موندنې وړاندې کړې؛ راپور ښيي چې د طالبانو سیاستونه څنګه ښځې له زدهکړې، کار، ټولنیزې او سیاسي برخې اخیستنې محرومې کړې او د جنسي تاوتریخوالي پېښې په ښکاره ډول زیاتې کړې دي.
ګډونوالو په پای کې په یوه اعلامیه کې نړیواله ټولنه د بیړنیو اقداماتو، په شمول د جنسي آپارتاید رسمي پېژندنې، هدفمند بندیزونو تصویب، او د افغان ښځو او انجونو معناداره ملاتړ ته بلنه ورکړه.
