د معمار خبری آژانس د راپور له مخې، د طالبانو د بهرنیو چارو وزارت اعلان وکړ چې د ترکیې د سفیر، جینک اونال ماموریت په افغانستان کې پای ته رسېدلی دی. د طالبانو د بهرنیو چارو وزات د شنبه په ورځ د قوس ۸مه په خبرپاڼه کې ویلی چې امیرخان متقي، د طالبانو د بهرنیو چارو وزیر، په کابل کې د ترکیې د جمهوریت سفیر سره وکتل.
ددې وزارت په خبرپاڼه کې راغلي چې متقي د ترکیی د سفیر د ماموریت په اوږدو کې د هغه د دیپلوماټیکو خدماتو ستاینه وکړه او د پاکستان او طالبانو ترمنځ د خبرو په کوربهتوب کې د انقرې د رغنده رول لپاره مننه څرګنده کړه. د ترکیې سفیر په کابل کې په دې لیدنه کې وویل چې د ترکیې حکومت به له افغانستان سره خپل ملاتړ ته دوام ورکړي او ټینګار یې وکړ چې ترکیه د افغانانو د اقتصادي پراختیا، روغتیا او نورو اړینو برخو د ملاتړ ژمنه کوي.
ترکیه هغه لږ شمېر هېوادونو کې شامل دی چې د ۲۰۲۱ کال په اګست کې د افغانستان د مخکینی حکومت له سقوط وروسته یې خپل سفارت په کابل کې فعال ساتلی دی. دغه هېواد هڅه کړې چې د طالبانو ادارې سره په دیپلوماټیکو او بشري مرستو کې منځګړیتوب وکړي. په تېرو څلورو کلونو کې د طالبانو هیئت څو ځلې ترکیې ته سفر کړی دی او د دواړو لوریو ترمنځ فني، سیاسي او اقتصادي همکاری روانې دي. جینک اونال د خپل ماموریت په ترڅ کې په کابل کې یو فعال دیپلوماټ و او د طالبانو تر واکمنۍ لاندې د ترکیې او افغانستان د اړیکو د دوام په برخه کې مهم رول لوبولی دی. لا هم د هغه ځای ناستی په رسمي ډول نه دی ټاکل سوی.
