د معمار خبري آژانس د راپور له مخې؛ په پاکستان کې پر افغان کډوالو د فشارونو د زیاتېدو په دوام، سرچینې وایي چې د پاکستان پولیسو د اسلاماباد ښار په فیصلټاون سیمه کې درې افغان خبریالان نیولي دي.
د سرچینو په وینا، د دغو افغان خبریالانو نومونه ذکرالله یزداني، عاشقالله جلالزوی او عتیقالله رحیمي دي.
سرچینې زیاتوي چې د پاکستان پولیسو د شپې شاوخوا د ۱:۰۰ بجې د دغو خبریالانو د استوګنې پر ځای چاپه وهلې او د هغوی د کور دروازه یې هم ماته کړې ده.
د سرچینو د معلوماتو له مخې، تراوسه د پاکستان د پولیسو له لوري د دغو درېیو خبریالانو د نیولو لامل نه دی روښانه سوی او د دغه هېواد امنیتي چارواکو هم په دې اړه څه نه دي ویلي.
د پاکستان پولیسو او د دغه هېواد نورو رسمي چارواکو د دې راپور تر خپرېدو پورې د دغو نیونو په اړه کوم غبرګون نه دی ښودلی.
دا په داسې حال کې ده چې په وروستیو اوونیو او میاشتو کې د پاکستان پولیسو د اسلاماباد او د دغه هېواد د نورو ښارونو په بېلابېلو سیمو کې د افغان کډوالو د نیولو او جبري ایستلو لپاره د کور په کور پلټنو لړۍ شدیده کړې ده.
د دغو اقداماتو په ترڅ کې لسګونه افغان وګړي، د خبریالانو په ګډون، نیول سوي او د پاکستان څخه د جبري ایستلو له ګواښ سره مخ سوي دي.
