په اروپا کې مېشت افغانانو د ملګرو ملتونو په ملاتړ د ملي جرګې د جوړېدو غوښتنه وکړه

د معمار خبري آژانس د راپور له مخې، جرمني مېشتو یو شمېر افغانانو د «ملي محور» په نوښت او کوربتوب د «ملي مرکه» په نوم ناسته د هامبورګ په ښار کې جوړه کړه. په دې غونډه کې چې نږدې ۱۰۰ تنه د فرهنګي، علمي، سیاسي او ټولنیزو شخصیتونو — په ځانګړي ډول ښځو او ځوانانو — برخه اخیستې وه، ګډونوالو د افغانستان پر اوسني وضعیت او له روان بحران څخه د وتلو پر عملي لارو بحث او نظرونه تبادله کړل. د ناستې جوړونکو د دې غونډې موخه «د ګډې فکري فضا رامنځته کول د خلکو د نظرونو او غوښتنو د راټولولو لپاره» بللې ده. هغوی وایي هڅه کوي چې د «ملي مرکه» بنسټ د افغانانو د غږ د انعکاس لپاره د یوه ګډ ادرس په توګه له هېواده بهر پیاوړی کړي. په دې ناسته کې ټینګار وسو چې د «ملي مرکه» استازولۍ دې په بېلابېلو هېوادونو کې جوړې سي، او ګډونوالو وړاندیز وکړ چې دا جوړښت دې وکولای سي د ملګرو ملتونو په ملاتړ «د بهر مېشتو افغانانو ملي جرګه» جوړه کړي. ګډونوالو دغه نوښت د مهاجرو افغانانو د فکري او سیاسي یووالي په لور یو مهم ګام وباله او غوښتنه یې وکړه چې دا ډول پروګرامونه دې په نورو هېوادونو کې هم دوام ومومي.