د طالبانو د کرنې، مالدارۍ او اوبو لګولو وزارت اعلان کړی چې په روان لمریز کال کې په ټول افغانستان کې له ۱۵۸ زره ۲۰۵ متریک ټنو څخه ډېره پنبه ترلاسه سوې ده. د وزارت په وینا، دا حاصل د شاوخوا ۱۰۴ زره هکتاره کرنیزې ځمکې څخه ترلاسه سوی دی.
د کرنې د وزارت چارواکو دا شمېرې د کروندګرو د دوامداره فعالیت او د پنبې د تولید په کچه د ثبات نښه ګڼلی ده.
د ورکړل سویو معلوماتو له مخې، د پنبې تر ټولو زیات تولید په هلمند، بلخ، جوزجان او کندهار ولایتونو کې ثبت سوی دی. دغه ولایتونه د هېواد د مهمو کرنیزو سیمو په توګه پېژندل کېږي او په تېرو کلونو کې یې د پنبې په تولید کې مهم رول لوبولی دی.
د کرنې وزارت ټینګار کړی چې پنبه د ارزښتناکه صادراتي محصول په توګه پېژندل کېږي او د خشخاش د بدیل کښت لپاره مناسب انتخاب کېدای سي. د وزارت په باور، د پنبې د کښت پراختیا کولای سي زراعتي اقتصاد وده وکړي او د کروندګرو عاید زیات کړي.
د تیر کال د شمېرو له مخې، شاوخوا ۱۰۵ زره هکتاره ځمکه د پنبې د کښت لاندې وه چې له هغې څخه ۱۵۹ زره متریک ټنه حاصل ترلاسه سوی و. د احصائیې او معلوماتو اداره هم مخکې ویلي و چې د پنبې کښت ۱۲٪ او حاصل یې شاوخوا ۳۰٪ زیات سوی دی.
پنبه د افغانستان له مهمو صادراتي محصولاتو څخه ګڼل کېږي او د سیمې هېوادونه یې اصلي پیرودونکي دي. دا محصول د مناسب کیفیت او نسبتاً ټیټ تولیدي لګښت له امله د نړیوالو بازارونو توجه ځان ته راجلب کړې ده.
د افغانستان د پنبې د صادراتو له مهمو هېوادونو څخه ایران او ازبکستان ته اشاره کیدای سی، ځکه جغرافیایي نږدېتوب او د نساجۍ صنایعو اړتیاوې د افغانستان د پنبې د صادارتو لپاره مناسب فرصت رامنځته کړی دی.
همدارنګه، د منځنۍ آسیا او جنوبي آسیا ځینې هېوادونه هم د افغانستان د پنبې د وارداتو له پاره علاقهمند دي، ځکه په دې هېوادونو کې د تار او ټوکر د جوړولو فابریکې د ښه کیفیت لرونکو لومړنیو موادو ته اړتیا لري.
اقتصادي شنونکي وايي چې که د بستهبندۍ، د محصول د چمتو کولو او د صادراتو سمبالښت ښه سي، د افغانستان پنبه کولای سي په نړیوالو بازارونو کې غوره مقام ترلاسه کړي. د دوی په باور، د کورنیو صنایعو رامنځته کول او د محصول ارزښت لوړول د دې سکتور لپاره مهم فرصت ګڼل کېږي.
په وروستیو کلونو کې پنبه د خشخاش د کرلو له مهمو بدیلو لارو څخه ګڼل سوې ده. دا یو قانوني محصول دی، نړیوال بازار لري او کروندګرو ته د دوامدار عاید د برابرولو وړتیا لري.
د خشخاش پر خلاف چې له محدودیتونو، خطرونو او قانوني پایلو سره مل دی، پنبه یو صنعتي محصول ګڼل کېږي او د کورني او نړیوال بازار لپاره د خرڅلاو وړتیا لري؛ دغه ځانګړتیا کروندګرو ته ډاډ ورکوي چې د دې محصول کرني ته مخه کړي.
