پراخه کرنیز ظرفیتونه او بهرنیو محصولاتو ته اړتیا

د روسیې د کرنیزو صادراتو دولتي ادارې اعلان وکړ چې افغانستان په ۲۰۲۴ کال کې د هیواد د اوړو ترټولو لوی واردوونکي و. د دې راپور له مخې، افغانستان تېر کال له روسیې څخه د ۸۰ ملیون ډالرو په ارزښت اوړه واخیستل. دا واردات په افغانستان کې د غنمو د ناکافي تولید له امله وو او داخلي کرنه د کورنیو اړتیاوو د پوره کولو لپاره کافي تولیدي ظرفیت نلري. په ۲۰۲۴ کال کې له روسیې څخه افغانستان ته د اوړو واردول د دې هېواد د مصرف کوونکي چلند یوه څرګنده نښه ده. د راپورونو له مخې، افغانستان له روسیې څخه د اوړو تر ټولو لوی واردوونکي هېواد ګرځېدلی دی، چې د ۸۰ ملیون ډالرو په ارزښت یې دا محصول اخیستی دی. دا په داسې حال کې ده چې افغانستان د یو کرنیز هیواد په توګه پیژندل کیږي چې بډایه طبیعي سرچینې، حاصلخیزې ځمکې او پراخو د اوبو سرچینې لري. خو، افغانستان لا هم په داخل کې د خوراکي توکو اړتیاوې، په ځانګړې توګه د غنمو او اوړو په سکتورونو کې، نه دي پوره کړي. له روسیې څخه د اوړو او غنمو په وارداتو تکیه نه یوازې د کورني تولید د ظرفیت کمښت پایله ده، بلکې دا د افغانستان په زیربناوو، کرنیزو پالیسیو، او اقتصادي او امنیتي شرایطو کې ژورې ستونزې منعکسوي. د سرچینو ضعیف مدیریت، د عصري کرنیزو ټیکنالوژیو نشتوالی، په زیربناوو کې د پانګونې نشتوالی، او د سیاسي ناکراریو او جګړې اوږدمهاله اغیزو په څیر عوامل په افغانستان کې د کرنې د بشپړ ظرفیت د ترلاسه کولو مخه نیولې ده. دا وضعیت په داسې وخت کې رامنځته شوی چې روسیې د طالبانو له حکومت سره د اړیکو د پیاوړتیا په هڅه کې افغانستان ته د اوړو صادرات دوه چنده کړي دي. په نړیواله کچه، روسیه د کرنې په بازار کې یو لوی لوبغاړی ګرځیدلی چي تیر کال یې د 300 ملیون ډالرو په ارزښت اوړه صادر کړي دي. له همدې امله، سره له دې چې افغانستان د خپلو بډایه طبیعي سرچینو سره سره، د کرنې د ځان بسیاینې په لاره کې له پراخو ننګونو سره مخ دی. خو، په وارداتو باندې د تکیې کمولو او د خپلو کورنیو اړتیاوو د پوره کولو لپاره، هیواد اوږدمهاله پلان جوړونې، په کرنیز سکتور کې پانګونې، او د تولید او پروسس زیربنا ښه والي ته اړتیا لري. د عصري اوبو لګولو پروژو جوړول، د بزګرانو روزنه، او د کورنیو تولیدونکو ملاتړ کولای شي افغانستان له دې بحراني حالت څخه وباسي او د کرنیزو اړتیاوو د پوره کولو لپاره د کرنې ودې او پراختیا په لور بوځي.