د معمار خبري آژانس د راپور له مخې؛ طاهر اندرابي، د پاکستان د بهرنیو چارو وزارت ویاند، د جمعې په ورځ په یوه خبري غونډه کې وویل چې اسلامآباد د طالبانو ادارې سره په سعودي عربستان کې د هر ډول خبرو اترو څخه بېخبره دی.
اندرابي ټینګار وکړ چې تراوسه د سعودي عربستان له خوا پاکستان ته د منځګړیتوب کوم رسمي وړاندیز نه دی سوی.
د دغه پاکستانی چارواکي څرګندونې په داسې حال کې مطرح کېږي چې مخکې ځینې سرچینو راپور ورکړی وو چې د طالبانو استازو او د پاکستان چارواکو ترمنځ په ریاض کې مذاکرات سوي دي. د دې ناستو هدف د سرحدي کړکېچونو کمول او د دواړو خواوو سیاسي او امنیتي اړیکو ارزونه بلل سوې وه.
خو د پاکستان د بهرنیو چارو وزارت رسمي دریځ ښيي چې یا دا مذاکرات په غیر رسمي ډول سوي یا د پاکستان حکومت نه غواړي چې د دې خبرو جزییات علني کړي. د سرحدي کړکېچونو او د افغان مهاجرو د اخراج موضوعات د دواړو هېوادونو اړیکې لا پسې تنګې کړې دي.
