د معمار خبری آژانس د راپور له مخې؛ د پاکستان د بهرنیو چارو وزارت ویلي چې د اسلامآباد او کابل ترمنځ د اوربند هوکړه نور شتون نه لري، ځکه چې ددۍ وزارت په وینا، د افغانستان له خاورې بریدونه لا هم ادامه لري. طاهر اندرابي، د پاکستان د بهرنیو چارو وزارت ویاند، د یوې خبري ناستې پر مهال وویل: «له افغانستانه د بریدونو دوام د دواړو هېوادونو ترمنځ د اوربند د هوکړې له شرطونو سره په ټکر کې دی او دا حالت د منلو وړ نه دی.»
هغه ټینګار وکړ چې د پاکستان پوځ د هېواد د ځمکنۍ بشپړتیا د دفاع لپاره د افغانستان له خاورې د هر ډول احتمالي ګواښ په وړاندې بشپړ چمتووالی لري. دغه څرګندونې په داسې حال کې کېږي چې په وروستیو اوونیو کې د اسلامآباد او طالبانو ترمنځ کړکېچ ډېر سوی دی. پاکستان بیا بیا طالبان تورن کړي چې د اسلامآباد د مخالفو وسلهوالو ډلو، په ځانګړي ډول TTP، ته په افغانستان کې د فعالیت اجازه ورکوي. خو طالبان دا تورونه ردوي او ادعا کوي چې د افغانستان خاوره د هېڅ هېواد پر ضد نه کارېږي. د دواړو هېوادونو اړیکې په ځانګړې توګه وروسته له هغې ترینګلې سوې چې د ډیورند کرښې په امتداد ډزې زیاتې سوې او پاکستان د افغان کډوالو پراخ ایستل پیل کړل.
