پاکستان د افغان وګړو لپاره د کډوالۍ کارتونو موده غځولې ده

د معمار پرس د خبر له مخې؛ د افغان کډوالو د وضعیت په اړه د مدني ټولنې او د بشري حقونو د فعالانو له اندېښنو وروسته د پاکستان حکومت اعلان وکړ چي د افغان مهاجرینو د راجستریشن سند (PoR) کارتونو د اعتبار موده د ۱۴۰۴ کال د سرطان د میاشتې تر ۹ نیټې (د ۲۰۲۵ کال د جون تر ۳۰) پورې غځول شوې ده. د پاکستان د ډان ورځپاڼې د رپوټ له مخې دغه خبر په داسې حال کښې خپور شو چې د دغه هېواد ستره محکمه د افغان مهاجرو د ډله ایز اخراج په خلاف د درخواستونو د څېړلو په حال کښې دی. په پاکستان کې د افغان مهاجرینو شمیر چې د PoR کارتونه لري ۱.۳ ملیون اټکل کیږي. برسېره پر دې، شاوخوا ۷۰۰,۰۰۰ نور خلک د افغان تابعیت کارتونه (ACC) لري. د کارتونو د غځولو پرېکړه وروسته له هغه وشوه چې د پاکستان حکومت د ۲۰۲۳ کال په اکتوبر میاشت کې اعلان وکړ چې په لویه کچه د افغان کډوالو د ایستلو پلان لري.