د معمار خبري آژانس د راپور له مخې؛ د پاکستان د بهرنیو چارو وزارت ویلي چې د ملګرو ملتونو د امنیت شورا راپور په افغانستان کې د ترهګرو ډلو حضور او فعالیت تاییدوي، او دا موضوع د طالبانو له هغې ادعا سره په ټکر کې ده چې ګواکې د افغانستان خاوره د نورو هېوادونو پر ضد د بریدونو لپاره نه کارول کېږي.
طاهر حسین اندرابي، د پاکستان د بهرنیو چارو وزارت ویاند، ویلي چې په افغانستان کې فعالې ترهګرې ډلې د اسلاماباد او طالبانو ترمنځ د باثباته اړیکو د ټینګېدو خنډ ګرځي او د سیمې د سولې او امنیت لپاره جدي ګواښ بلل کېږي.
د هغه په وینا، د ملګرو ملتونو د امنیت شورا راپور د (ټيټيپي)، داعش خراسان څانګې او القاعده په څېر ډلو فعالیت ته اشاره کړې ده.
اندرابي زیاته کړې چې د دغه راپور له مخې، ټي ټي پي د «سیمهییز امنیت تر ټولو ستر ګواښ» په توګه معرفي سوې او د افغانستان له خاورې د دې ډلې فعالیتونه پاکستان او د سیمې نورو هېوادونو ته جدي اندېښنې راولاړوي.
دا څرګندونې په داسې حال کې مطرح کېږي چې طالبان تل ټینګار کوي چې د افغانستان خاوره به د نورو هېوادونو پر ضد ونه کارول سي؛ هغه ادعا چې پاکستان پرلهپسې رد کړې او طالبان یې د افراطی ډلو په پناه ورکولو تورن کړي دي.
