د معمار خبري آژانس د راپور له مخې، د پاکستان ډیپلوماتیکو سرچینو اکسپرس ټریبون ورځپاڼې ته ویلي چې اسلامآباد تر هغه وخته پورې د طالبانو د حکومت ملاتړ نه کوي چې د امنیتي اندېښنو په برخه کې وضاحت ورنه کړي.
ددې سرچینو په وینا، د طالبانو په وړاندې د پاکستان دا بدلون سنجول سوی پریکړه، او د امنیتی وضعیت د ارزونې په اساس ترسره سوی دي. اکسپرس ټریبون ورځپاڼې سه شنبې، ۲۲ د میزان، په راپور کې لیکلي چې پاکستان د افغانستان سره د سرحدي نښتو لپاره «نوې قواعد» وضع کړي دي.
د دې نوې پالیسۍ له مخې، له افغانستان څخه به هر ډول تروریستي حمله د پاکستاني ځواکونو له لوري «فوري او قاطع غبرګون» سره مخ سي. همدارنګه، د پاکستان د بهرنیو چارو وزارت د دوشنبې په ورځ په رسمي بیان کې طالبانو ته سپارښتنه کړې چې مسؤلانه عمل وکړي، د تروریزم پر وړاندې خپلو ژمنو پابند پاتې سي او د امنیتي ګواښونو د له منځه وړلو لپاره مثبت رول ولوبوي.
په همدې حال کې، ددې بیان یو د پام وړ ټکي دا دې چې د پاکستان د بهرنیو چارو وزارت د «د افغانستان موقتي حکومت» پر ځای، د «د افغانستان د طالبانو رژیم» اصطلاح کارولې؛ داسې بدلون چې د سیاسي څارونکو له نظره ښایي د دواړو لوریو تر منځ د اړیکو د سوړوالي نښه وي.
