د معمار پرس د خبر له مخې؛ د امریکا ولسمشر ډونالډ ټرمپ کانګرس ته په خپله وینا کې اعلان وکړ چې د ۲۰۲۱ کال د کابل هوايي ډګر د ځانمرګي برید مسؤل کس نیول شوی دی.
هغه ټینګار وکړ چې دغه کس د امریکا په لور روان دی او د هغه په توقیف کې یې د پاکستان د همکارۍ څخه مننه وکړه.
ټرمپ دغه سړی “خطرناک” وباله، خو د هغه د هویت یا د هغه د توقیف د څرنګوالي په اړه یې نور جزئیات ورنه کړل.
خو سپینې ماڼۍ په یوه اعلامیه کې چې په ټولنیزه شبکه ایکس کې خپره شوې، اعلان وکړ چې د داعش د خراسان څانګې غړی محمد شریف الله، چې د برید د تنظیمولو مسؤل و، به د محاکمې لپاره متحده ایالاتو ته ولیږدول شي.
