د معمار پرس د خبر له مخې؛ د کریملین ماڼۍ تایید کړه چې د روسیې او امریکا ولسمشرانو ولادیمیر پوتین او ډونالډ ټرمپ ترمنځ لیدنه به د اګست په ۱۵مه په الاسکا ایالت کې ترسره شي.
دا به د روسیې د ولسمشر لخوا الاسکا ته لومړی سفر وي. د پوتین مرستیال یوري اوشاکوف وویل چې الاسکا د بیرینګ تنګي له لارې د جغرافیایي نږدېوالي او په ارکټیک کې د دواړو هیوادونو د ګډو ګټو له امله غوره شوې ده.
د خبرو اترو اصلي تمرکز به د اوکراین جګړې لپاره د اوږدمهاله حل لارو لټول وي، او همدارنګه په سیمه کې ګډ اقتصادي او چاپیریالي پروژې.
