د معمار خبري آژانس د راپور له مخې؛ سرچینو ويلي چې نورالدین عزيزي، د طالبانو د حکومت د صنعت او تجارت وزیر به د چهارشنبې په ورځ، د عقرب ۲۸مه، د پنځو ورځنۍ سفر لپاره د هند پلازمېنې نوي ډهلي ته روان سي. د هندي رسنيو د راپور له مخې، د دې سفر اساسي موخه د هند نړيوال سوداګريز نندارتون کې ګډون بلل سوی دی. ټاکل سوې چې عزيزي د سفر پر مهال له پیوش ګویال، د هند د سوداګرۍ او صنعت له وزیر سره هم وویني او خبرې اترې ورسره وکړي.
دا سفر په داسې حال کې ترسره کېږي چې د افغانستان او هند سوداګریزې اړیکې په وروستيو کلونو کې، په ځانګړي ډول له هغه وروسته چې طالبان بېرته واک ته رسېدلي، له ننګونو سره مخ سوې دي. سره له دې، هند لا هم د افغانستان د صادراتو په مهمو بازارونو کې شمېرل کېږي، او د طالبانو د پلاوي شتون په دغه نندارتون کې کولای سي د دواړو هېوادونو د اقتصادي اړیکو د پياوړتیا لپاره نوې هڅې رامنځته کړي. تر اوسه د دوه اړخیزو ناستو د اجنډا په اړه نور جزئيات نه دي خپاره سوي، خو اټکل کېږي چې د صادراتو، وارداتو او سيمهييزو همکاریو موضوعات به د خبرو اترو په سر کې وي.
