د معمار خبري آژانس د راپور له مخې، نادیه ندیم، د ډنمارک افغانستان اصله فوټبالره، د ښځو په برخه کې د ۲۰۲۵ کال د «طلایي پښې» نړیواله جایزه وګټله. هغې دغه جایزه د موناکو پاچا، دویم شهزاده البرت، څخه ترلاسه کړه. د نارینهوو برخه کې هم انټونیو ګریزمن، د اتلتیکو مادرید فرانسوي ستوری، د دې جایزې ګټونکی سوی دی.
د «موناکو طلایي پښې نړیوالې جایزې» بنسټ په یوه اعلامیه کې ویلي چې نادیه ندیم یوازې یو استثنايي فوټبالره نه ده، بلکې د هغې د ژوند کیسه د نړۍ لپاره الهامبښونکې ده. د دې بنسټ په وینا، ندیم د فوټبال له ډګره تر روغتونه، د ښځو د ځواکمنتیا لپاره له هڅو تر سپورت کې د خنډونو ماتولو پورې، د ځواک، زغم او هیلهمندۍ یوه بېلګه ده. «د طلایي پښې جایزه» د فوټبال له معتبرو نړیوالو جایزو څخه ده چې د ۲۸ کلونو څخه پورته لوبغاړو ته ورکول کېږي او هر لوبغاړی یوازې یو ځل دا جایزه ترلاسه کولی سي.
نادیه ندیم لومړنۍ ډنمارکۍ لوبغاړې ده چې دا ویاړ ترلاسه کوي او په دې لاره کې یې د بارسلونا ستورې، الیکسیا پوتیاس، په څېر سیالانو څخه مخکې سوې ده. نادیه ندیم په ۱۹۸۸ کال کې د افغانستان هرات ښار کې زېږېدلې او په ۲۰۰۰ کال کې له خپلې کورنۍ سره ډنمارک ته مهاجره سوې ده. هغه د ډنمارک د ښځو د فوټبال د ملي ټیم غړې ده او د اروپا په سترو کلبونو لکه منچسټر سیټي انګلستان، پاریس سنجرمن فرانسه او آث میلان ایټالیا کې یې لوبه کړې ده.
