مولوي عبدالسلام حنفي د پارک شهر او د تېلو د هغه ټانک چې ويل کېږي په غير قانونې ډول جوړ شوي دي، ارزونه وکړه

د رياست الوزرا اداري مرستيال مولوي عبدالسلام حنفي د هغې دندې پر اساس چې د اسلامي امارت کابينې له لوري د کابل ښاروالۍ فعاليتونو ارزولو په موخه ورسپارل شوې وه، پرون د يوه پلاوي په مشرۍ د پارک شهر او د تېلو له هغه ټانک څخه چې په غير قانوني ډول جوړ شوي، ليدنه وکړه.
په دې ارزونه کې له نوموړي سره لوی څارنوال مولوي شمس الدين شريعتي، د اطلاعاتو او فرهنګ وزارت معين مولوي سعدالدين سعيد، د امر بالمعروف، نهې عن المنکر او شکايتونو اورېدو وزارت استازی، د چارو ادارې استازی او د کابل ښاروالۍ استازي هم ملتيا کوله.
د دې کتنې په ترڅ کې د کابل ښاروالۍ د کړنو څار او ارزونه وشوه او د رياست الوزرا اداري مرستيال او ورسره پلاوي د تېلو ټانک او تاسيساتو موضوع چې په پياده رو او د کابل سيند په حريم کې په غير اصولي ډول جوړ شوي وارزول او په دې اړه يې لازم تصميمونه ونيول.